O‘zbekiston to‘qimachilik sanoatini rivojlantirish, uning raqobatbardoshligini ta’minlash, tarmoq eksport salohiyatini oshirish borasida hukumatimiz tomonidan bir qator huquqiy-me’yoriy hujjatlar qabul qilingan bo‘lishiga qaramay, muammolar saqlanib qolmoqda. Korxonalarni rekonstruksiya qilish, zamonaviy ilg‘or texnologiya bilan jihozlash, mahsulot assortimentlarini kengaytirish raqobatbardoshlikning asosiy omillari hisoblanadi. Korxonalarning bozor iqtisodiyoti sharoitiga moslashuvi, yangi texnologiyalarni qo‘llashi, yuqori malakali kadrlarni tayyorlashi, dunyo bozoriga mahsulotlarni olib chiqishi uzoq muddatga mo‘ljallangan, ilmiy asoslangan rivojlanish strategiyasini ishlab chiqishni talab qilmoqda. O‘z navbatida, bunday strategiyani ishlab chiqishning ilmiy-uslubiy asoslarini yaratish, korxonalarning kuchli va zaif tomonlarini chuqurroq tahlil qilish, mavjud imkoniyatlardan samarali foydalanish bo‘yicha aniq amaliy taklif va tavsiyalar ishlab chiqishni talab etadi. Shu sababli iqtisodiyotni modernizatsiyalash va tarkibiy o‘zgartirishlarning ustuvor yo‘nalishlaridan bo‘lgan tikuv-trikotaj korxonalarini tikuv-trikotaj buyumlari xalqaro bozorlarida raqobat strategiyalarini ishlab chiqish bugungi kunning dolzarb muammolaridan biri bo‘lib qolmoqda.