O‘zbekistonda moliya bozorining asosiy elementini tijorat banklari tashkil etib, bank tizimida davlat ulushini pasaytirish, banklar rentabellik ko‘rsatkichlarini oshirish, aholiga qulay va jozibali innovatsion xizmatlarni ko‘rsatishni takomillashtirish dolzarb ahamiyat kasb etmoqda. Xususan, O‘zbekiston Respublikasi Prezidenti tomonidan “bank tizimi aktivlarining umumiy hajmida davlat ulushi bo‘lmagan banklar aktivlari ulushini joriy 15 foizdan 2025-yilga kelib 60 foizgacha oshirish hamda banklar majburiyatlarining umumiy hajmida banklarning xususiy sektor oldidagi majburiyatlari ulushini joriy 28 foizdan 2025-yil yakuniga 70 foizgacha oshirish”2 borasida vazifalar belgilab berilgan. Ushbu vazifalarni samarali amalga oshirishda tijorat banklari resurslari mustahkamligini ta ’minlash va resurs jalb qilishda raqamli texnologiyalardan samarali foydalanishga qaratilgan ilmiy tadqiqot ishlari dolzarb ahamiyat kasb etadi.