Jahonda raqamlashtirish sharoitida yirik shaharlarning uy-joy fondini boshqarishni takomillashtirish masalalariga yo‘naltirilgan qator ilmiy izlanishlar amalga oshirilmoqda. Uy-joy kommunal xo‘jaligini rivojlantirish orqali aholining hayot sifatini ta’minlash, aholiga isitish, yoritish, uy-joy, obodonlashtirish, kanalizatsiya va sivilizatsiyaning boshqa afzal jihatlari bo‘yicha xizmat ko‘rsatishda har bir iste’molchiga individual yondashuvni ta’minlash, megapolislarda shahar xo‘jaligini boshqarish jarayonlarini avtomatlashtirish va raqamlashtirish, har bir yirik shahar va hududning o‘ziga xos muammolari va o‘sish nuqtalarini aniqlash va kompleks rivojlanish loyihasiga kiritish kabi masalalar bu boradagi ilmiy tadqiqotlarning ustuvor yo‘nalishlaridan hisoblanadi.
