Жаҳоннинг ривожланган мамлакатлари ижро этувчи ҳокимият органларида қабул қилинаётган норматив-ҳуқуқий ҳужжат лойиҳаларини идоралараро электрон келишиш тартиб-таомилини оптималлаштириш ва расмиятчиликнинг олдини олишга қаратилган тизимини жорий этиш самарали қарор қабул қилиш механизмларини вужудга келтирди. Хусусан, айрим мамлакатларда (Австралия, Япония, Янги Зеландия, Норвегия, Буюк Британия, АҚШ) маҳаллий давлат ҳокимияти органларида бошқарув қарорлари қабул қилиш жараёни кўпроқ очиқлик ва шаффофликка асосланиш (норматив-ҳуқуқий ҳужжатлар ишлаб чиқиш ва қабул қилиш жараёнида жамоатчилик эшитуви ва муҳокамаси ҳамда давлат маслаҳатлашувини ташкил этиш) тенденцияси кузатилади. Бу маҳаллий давлат бошқарувида «New public management» («Янги давлат бошқаруви») ва «Good governance» («Самарали давлат бошқаруви») тамойиллари жорий этилишида намоён бўлмоқда.